Nýliðun í faginu var eitt af áherslumálum stjórnar starfsárið 2018-2019. Með það fyrir augum skipaði stjórn starfshóp í október 2018 sem hafði það hlutverk að vinna að því að koma á laggirnar námi í jarðvirkjun, líkt og tíðkast víðast hvar í nágrannalöndum okkar. 

Starfshópinn skipuðu tveir stjórnarmenn félagsins ásamt tveimur starfsmönnum Samtaka iðnaðarins. Markmið verkefnisins var m.a. að stuðla að auknum gæðum í faginu, auka skilvirkni og ýta undir nýliðun. Verkefnið hlaut hámarksstyrk að fjárhæð kr. 5.000.000,- úr Framfarasjóði SI. 

Ráðinn var verkefnastjóri, Ásdís Kristinsdóttir, til að halda utan um verkefnið, s.s. myndun námskrár, þróun raunfærnimats o.fl., í samráði við samtökin. Þá var stofnaður stýrihópur sem skipaður var fulltrúum frá SIV auk Tækniskólanum, SI og menntamálaráðuneytinu. Stýrihópurinn hélt til Svíþjóðar og Noregs í október 2019 að skoða sambærilega skóla þar. Samkomulag um stofnun námsbrautarinnar var undirritað af samstarfsaðilum í nóvember 2019 og hófst nám í jarðvirkjun í Tækniskólanum haustið 2021.

Tækniskólinn sinnir bæði bóklegri og verklegri kennslu en henni er sinnt í fullkomnum vinnuvélahermum sem samþykktir voru af fulltrúum samtakanna. Með þeirri nálgun gefst nemum tækifæri á að hefja verklega kennslu frá fyrsta námsdegi. Aðildarfyrirtæki Samtaka innviðaverktaka taka svo við starfsnemum til frekari þjálfunar þegar líður á nám hvers og eins nema. Með því fyrirkomulagi fá nemendur tækifæri til að undirbúa sig vel fyrir starfsnám í atvinnulífinu í öruggu og umhverfisvænu umhverfi.

Hér má lesa um námsbrautina.